قصيدة تمضي شهور ولا نشاهد بعضنا لــ عبدالله بن عبار العنزي

يا راكـب اللـي تايـره مـا بـرم بـوش كـرتـون جـامـه تـونــا لـــه نقـضـنـا
من معرضه ما فيه صدمات ودقوش ولا يـوم لـه عنـد المهنـدس عرضنـا
ما سمكـروا بديـه ولا جـاه شاكـوش مـا فيـه ذارب غيـر سـعـره بهضـنـا
من مصنع اللي يرتدي كاب طربوش كـنــه تـعـلّـم صنـعـتـه قـبــل يـضـنـا
إلى نيش بنصه في مدق القـدم نـوش تـقـول طـــار وللخـضـيـرا نهـضـنـا
يركب عليـه مـن الشغاميـم مدغـوش عقـب الضهيـرة ينهمـه حيـن فضـنـا
مرسال يكفي عن مراسيل وطـروش مـنـدوب مـنــا مفوضـيـنـه عـوضـنـا
ودا الجواب اللي به الشعـر منقـوش أبيـات مــن شـعـري لنظـمـه لفضـنـا
وصـل جوابـي لابتـي نسـل حنتـوش الوضـع يـا وجيـه الرفـاقـه غمضـنـا
كلـن يقـول مـن المشاغـيـل ملـبـوش والعمـر يبـلا ولا نخـلـص غرضـنـا
والعبد مـن يخلـق بالأشغـال مبلـوش وأظـن مــا مــن فـايـده لــو ركضـنـا
صـارت مجالسنـا بواليـت ولـطـوش يـــا ربـعـنـا لازم نـعـالـج مـرضـنــا
لعب الورق مابـه مفيـده ولا قـروش غيـر المشـقـة والتـعـب وش قبضـنـا
أشوف وضع يالرفاقه ما هـو خـوش تمضـي شهـور ولا نشـاهـد بعضـنـا
يـا لابتـي مـا أنتـم هلابيـج وأختـوش والمصطفى بوصل القرابـه وعضنـا
جمع الرفاقه عـز يـا صفـوة الغـوش كانه قطع وصل الرحم وش حفضنـا
ومن صد لو قدامه الـدرب مفـروش لـــو أنتـعـلـق فـــي شلـيـلـه نفـضـنـا
مـن عافنـا لـو منزلـه جـار للـحـوش كانـه هجرنـا عـن وصـولـه رفضـنـا